Source : नेवा: अनलाइन न्युज – ललेन्द्र शाक्य | २०७४ भाद्र १३, मंगलबार १६:५१:१८
देय्न्यंकंया नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबूया भदौ १७ जुइगु न्याक्वःगु दँमुँज्याय् न्याम्ह पत्रकारतय्त सिरपाः लःल्हायेगु निर्णय याःगु दु ।
पत्रकार दबुलिं बिउगु जानकारी कथं वाङमय शताब्दी पुरुष सत्यमोहन जोशी पत्रकारिता सिरपा बरिष्ठ पत्रकार रमेशकाजी स्थापितयात, भिक्षु कुमार कास्यप स्मृति पत्रकारिता सिरपा क्रियाशिल युवा पत्रकार राजेन्द्र मानन्धरयात बिइगु निर्णय याःगु दु ।
उगु हे कथं ज्ञानदेवी स्थापित स्मृति पत्रकारिता सिरपाः हटौंडा वाःपौया सम्पादक मोहनमान सांगामीयात, बाबुराजा ज्यापु फोटो पत्रकारिता सिरपाः बरिष्ठ फोटो पत्रकार राजेन्द्र चित्रकारयात व पुरुषोत्तम–निरादेवी पत्रकारिता सिरपाः न्हापांम्ह नेवाः कार्टुनिस मोहन श्याम खोकनायात लःल्हायेगु नेवाः पत्रकार राष्ट्रिय दबूया केन्द्रीय सचिवालया बैठकं निर्णय याःगु दु ।
नेवाः पत्रकारतय्त हःपाः बिइगु नापं सम्मान यायेगु कथं अथे सिरपाः बिइगु निर्णय यानागु खः धकाः धाःगु दु । थुगुसीया दँमुँज्या नापं कार्यकारिणी सभाय् नेवाः पत्रकारतय्गु नितिं ग्वाहालि यायेत पत्रकारिता कल्याणकारी कोष तकं घोषणा याइगु जूगु दु ।
उगु दँमुँज्याय् स्वनिगःनापं स्वनिगः पिनेया थीथी जिल्लापाखें पत्रकार दबूया जिल्ला कचापाखें नं ब्वति काइगु जूगु दु ।
No comments:
Post a Comment