पत्रकार दबूया सचेतना ज्याझ्वःया ५० ब्व पूवन

कोरोना भाइरसया महामारीया निगगु लहरय् अस्पतालय् बेड, अक्सिजन, आइसीयु, भेन्टिलेटरया ब्यवस्थाय् ध्यान वनेमाःगुपाखें थीथी क्षेत्रया विज्ञतयसं ध्यानाकर्षण याकादीगु दु । नेवाः पत्रकार राष्ट्रिय दबुलिं न्ह्याकावःगु अनलाईन सचेतना ज्याझ्वलय् वक्तापिन्सं आःया अवस्थाय् स्वंगुलिं तहया सरकार जानाः न्ह्याःवनेमाःगुलिइ बः बिल । 

सचेतना ज्याझ्वःया ५० ब्व पूवंगु लसता हना अन्तरक्रिया ज्याझ्वलय् सांसद जीवनराम श्रेष्ठं कोरोना महामारीं स्वास्थ्य क्षेत्रय् नेपाःया अवस्था यक्व कमजोर धकाः छर्लङ्ग याःगु धयादिल । संसदया कोभिड १९ अध्ययन व अनुगमन उपसमितिया संयोजक तकं खःम्ह सांसद श्रेष्ठं सरकारयात १९ बुँदाय् सुझाव बियागु खँ कनादिल । सुझावय् अस्पतालयात अपडेट यायेगु, कोभिडयात ध्यानय् तया आइसीयु, भेन्टिलेर बृद्धि यायेगु, पर्याप्त अक्सिजन प्लान्ट जडान यायेगु लिसेंया खँ दुथ्याः । 

त्रिवि शिक्षण अस्पतालया जनरल प्राक्टिस व इमर्जेन्सी मेडिसिन विभागया प्रमुख प्रो. डा. योगेन्द्रमान शाक्यं त्रिवि शिक्षण अस्पताललिसें देयन्यंक बेड, आइसीयु व भेन्टिलेटर अभाव जुगु स्थितिया जानकारी बियादिल । वयकलं धयादिल ‘थ्व कोरोना इलय् थःत माःबलय् बेड मालेथाकूगु अनुभव जिं थम्हं याना, झन सर्वसावधारणया अवस्था गथे जुइ अनुमान यायेफु ।’ थज्याःगु स्थितीइ ग्यानाः मखु सतर्क जुयाः महामारीया सामना यायेमाःगु सल्लाह वयकलं बियादिल । 

समाजसेवी व सकारात्मक सोचया अभियन्ता कर्ण शाक्यया धापूकथं नं सरकारं ब्यूगु प्रोटोकलत पालना यायेगु व सतर्क जुइगु थ्व ईया आवश्यकता खः । वयकलं कोरोना रोग स्वयां मानसिक तनावं अप्वः प्रभावित जुयाच्वंगु धयादिल । ‘राज्य गैरजिम्मेवार जुल धाःसा झी झन अप्वः जिम्मेवार जुइमाः’ च्वमि शाक्यं कनादिल । 

सिविन नेपालया निर्देशक सुम्निमा तुलाधरं कोरोनाया निुगूगु लहर ग्यानापुयाच्वंगु धासें  पब्लिक हेल्थ सिस्टम कमजोर जुगुलिं सर्वसाधारणं दुःख सियाच्वंगु खँ तयादिल । वयकलं कोरोना इलय् फुक्क छेँ दुने लानाच्वंबलय् घरेलु हिंसा व मस्तयत जुइगु दुर्व्यवहार अप्वः जुयाच्वंगु पक्ष नं न्ह्यथनादिल । निर्देशक तुलाधरया कथं सिविनया बाल हेल्पलाइनय् जक ४८ गू यौन हिंसाया उजुरी दर्ता जूगु दु । 

वरिष्ठ सिने पत्रकार व नेवाः पत्रकार राष्ट्रिय दबूया सल्लाहकार विजयरत्न तुलाधरं लकडाउनं कला क्षेत्रया सिर्जना कुण्ठित जुयाच्वंगु धासें थुकियात हाथ्या कथं कयाः वैकल्पिक माध्यमं कलाकारिताया प्रवद्र्धन यायेगु अवसर नं दुगु धयादिल । ‘नेवाः संकिपा ख्यः संकुचित जुयाच्वंगु अवस्था खःसां डिजटल माध्यमं विकास जुयाच्वंगु दु । थ्वः माध्यमं तत्काल लवः मब्यूसां भविष्यय् आर्थिक रुपं निर्भर जुइगु प्लाटफर्म तयार जुइ’ वयकलं धयादिल । 

हलिंयात आक्रान्त याःगु कोरोना भाइरसया संक्रमण नेपालय् नं अप्वयावःबलय् थगुनेनिसें नेवाः पत्रकार राष्ट्रिय दबुलिं महामारीबारे सर्वसाधारणतय्त सुचं बीगु लिसें सचेत यायेत थुगु अनलाइन सचेतना ज्याझ्वः न्ह्याकूगु खः । प्रजित शाक्यया संयोजकत्वय् गठन जूगु सचेतना कवलय् दुजः कथं रचना श्रेष्ठ, मीना वज्राचार्य, तेजनाराण महर्जन, अनूप प्रधान व हसना लवजू दी ।