Sunday, February 10, 2019

विद्यासुन्दर शाक्यको पत्रकारलाई आग्रह

Address to sixth AGM of NFNJ by Bidhya Sundar Shakya, Mayor Kathmandu

२७ माघ, केके मानन्धर

काठमाडौं महानगरपालिकाका प्रमुख विद्यासुन्दर शाक्यले पत्रकारहरुलाई तथ्यमा आधारित पत्रकारिता गर्न आग्रह गरे । काठमाडौंमा आयोजित कार्यक्रमलाई सम्बोधन गर्दै शाक्यले पत्रकारसँगको सहकार्यमा समृद्धिको लागि हातेमालो गर्न आफु तयार रहेको पनि बताए ।

‘रानीपोखरी पुनर्निर्माणको लागि महानगरपालिका सक्षम छ । हामीले बजेट दिन्छौं भनेका छौं । तर अहिले आएर पुनर्निर्माण प्रधिकरणले बनाउने भएको छ ।’ शाक्यको भनाई थियो । महानगरले गर्ने प्रत्येक काममा एउटा पक्षले सधैं विरोध गर्दै आएको भन्दै शाक्यले आम नागरिकलाई तथ्यगत समाचार दिन पनि आग्रह गरे ।
देशैभरका नागरिक बस्ने राजधानी शहर व्यवस्थित र समृद्ध बनाउन साँचो अर्थको पत्रकारिता आवश्यक रहेको उहाँको भनाई थियो ।

हुन पनि काठमाडौं महानगरलाई पुनर्निर्माणको जिम्मा दिएर २ माघ २०७२ मा राष्ट्रपति विद्यादेवी भण्डारीले रानीपोखरी शिलान्यास गरेकी थिइन् । तर, पुनर्निर्माणमा विवाद देखिए पछि १४ माघमा बसेको मन्त्रिपरिषद्को बैठकले बालगोपालेश्वर मन्दिरसँगै रानीपोखरी पुनर्निर्माणको जिम्मा पुनर्निर्माण प्राधिकरणलाई दिने निर्णय गरेको छ ।


कार्यक्रममा पत्रकारहरुको लागि १० लाख रुपियाँको कल्याणकारी कोषको घोषणा गरेको छ । पत्रकारहरुको जटिल स्वास्थ्य समस्यामा सोही कोषमार्फत उपचार खर्च जुटाउने व्यवस्था मिलाइएको कोषाध्यक्ष सुरेन्द्रभक्त श्रेष्ठले जनाए । कार्यक्रममा विभिन्न दाताहरुले कल्याणकारी कोषमा ६ लाख तीन हजार ३ सय २३ रुपियाँ जम्मा गराएका छन् । सोही कोषमा महानगरपालिकाले ५ लाख नगद जम्मा गर्ने आश्वासन दिइएको थियो ।
केहि महिना यतादेखि मृगौँला सम्बन्धिको समस्याले पीडित अग्रज फोटो पत्रकार आशाकाजी महर्जनको लागि पनि नगद संकलन गरिएको थियो । महर्जनको लागि हङकङ नेवार समाजको तर्फबाट अध्यक्ष रचना प्रधानले एक लाख रुपियाँ नगद हस्तान्तरण गरिन् । सोही कार्यक्रममा अन्य दाताहरुले पनि नगद सहयोग गरेका थिए । मृगौँला पीडित महर्जनको उपचारको लागि यसअघि पनि दबूको अगुवाइमा करिव ६० हजार नगद संकलन गरेर हस्तान्तरण गरिएको थियो ।

देशभरका नेवार पत्रकारहरुको साझा संस्था नेवाः पत्रकार राष्ट्रिय दबूको छैटौं वार्षिक साधारणसभामा चार जना पत्रकारहरुलाई पुरस्कृत गरिएको छ । नेपाल संवत् ११३९ पोहेलागा आमै सोमबार बसेको सचिवालय बैठकले निर्णय गर्दै मोफसलका एक र उपत्यकाभित्रका तीन जना पत्रकारलाई जनही दस हजार नगद र पुरस्कार दिइएको हो ।


पुरस्कार ग्रहण गर्नेहरुमा रुकमणि श्रेष्ठलाई वाङमय शताव्दी पुरुष सत्यमोहन जोशी पत्रकारिता पुरस्कार दिइएको छ । २००८ सालदेखि प्रकाशित नेपालभाषाको ‘थौंकन्हय्’ मासिकलाई सम्पादन गर्दै आउनु भएकी श्रेष्ठलाई दोसल्ला ओडाएर पुरस्कृत गरिएको हो ।
सत्ताइस वर्ष यतादेखि पत्रकारितामा सक्रिय रहनुुभएका राष्ट्रिय समाचार समितिका सम्पादक राजु शाक्यलाई भिक्षु कुमार काश्यप स्मृति पत्रकारिता पुरस्कार दिइएको छ । शाक्यले बुद्ध धर्म तथा पत्रकारिताका विभिन्न विधामा लेख रचना प्रकाशित गरेका छन् ।
त्यस्तै, ज्ञानदेवी स्मृति पत्रकारिता पुरस्कार चितवनका पत्रकार इश्वरकुमार जोशीलाई दिइएको छ । बीबीसी नेपाली सेवामा आवद्ध जोशीले पत्रकारिता क्षेत्रमा लामो अवधिदेखि योगदान दिँदैआएका छन् ।
कार्यक्रममा ४३ वर्ष यतादेखि निरन्तर फोटो पत्रकारिता गर्दै आउनुभएका वरिष्ट फोटो पत्रकार नातिकाजी महर्जनलाई बाबुराजा ज्यापु फोटो पत्रकारिता पुरस्कार दिइएको छ । महर्जनलाई दिइएको पुरस्कार बापतको नगद भने उहाँले कल्याणकारी कोषमा जम्मा गराए ।
देशका विभिन्न २५ जिल्लामा शाखा बिस्तार गरिसकेको दबूको साधारणसभामा संघीय संरचना अनुरुपको विधान संशोधन गरिएको अध्यक्ष श्रीकृष्ण महर्जनले जनाए । महासचिव सुनिल महर्जनले प्रस्तुत गरेको संशोधन प्रस्तावमाथि सदस्यहरुले छलफल गरेर सुझावसहितको विधान पारित गरिएको छ । नयाँ विधान अनुरुप दबूले स्थानिय, प्रादेशिक तथा केन्द्रीय संरचना तयार गरेको छ ।
काठमाडौंको टेकुस्थित सासा बैंक्वेटमा आयोजित कार्यक्रममा महानगरपालिकाका प्रमुख विद्यासुन्दर शाक्य, प्रदेश ३ का सांसद राजेश शाक्य, प्रेस काउन्सिल नेपालका कार्यवाहक अध्यक्ष किशोर श्रेष्ठ, नेपाल आदिवासी जनजाती पत्रकार महासंघका अध्यक्ष डण्ड गुरुङ, अग्रज पत्रकार नरेशवीर शाक्य, विजयरत्न असंवरे लगायतको उपस्थिति थियोे ।

पत्रकार कल्याणकारी कोषमा नगद जम्मा गर्ने महानुभावहरुको सुची :

१) डा. महेशमान श्रेष्ठ रु. १५,०००।–
२) सुवर्ण केशरी चित्रकार रु. १५,०००।–
३) रमा कर्णजीत रु. १०,०००।–
४) कृष्णहरि महर्जन (सीता महर्जनको सम्झनामा) रु. १०,०००।–
५) शरद कुमार डंगोल रु. १०,०००।–
६) लक्ष्मीदास मानन्धर रु. २५,०००।–
७) पञ्चवीर सिंह तुलाधर रु. १,११,१११।–
८) कृष्णलाल महर्जन (सञ्चालक, महर्जन कम्प्लेक्स) रु. १,०१,०००।–
९) यज्ञरत्न धाख्वा रु. ५०,०००।–
१०) सुमन साय्मि (संयोजक, सडक बिस्तार पीडित संघर्ष समिति) रु. १,००,०००।–
११) दिनेश राम श्रेष्ठ रु. ११,१११।–
१२) गौतम शाक्य रु. ५०,०००।–
१३) लक्ष्मण गमाल रु. १०,१००।–
१४) राज्यलक्ष्मी बज्राचार्य (अध्यक्ष, मुद्दिता सेवा गृह) रु. ५०,०००।–
१५) सिद्धिबहादुर कर्माचार्य रु. ५०००।–
१६) विश्वरत्न तुलाधर रु. २०,०००।–
१७) नजराम महर्जन १०,०००।–
१८) ज्ञानबहादुर महर्जन ५,०००।–

नेवाः पत्रकार राष्ट्रिय दबूको छैटौं वार्षिक साधारणसभाका थप गतिविधि तस्बिरहरु :
















No comments:

Post a Comment