नेवाः पत्रकार राष्ट्रिय दबूपाखें आन्दोलन याइगु

Source : नेवा: अनलाइन न्युज – ललेन्द्र शाक्य | २०७४ आश्विन ६, शुक्रबार १५:१३:२१

देय् न्यंकंया नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबूपाखें नेपाल पत्रकार महासंघया संस्थापक नायः सत्यनारायण बहादुर श्रेष्ठयात घोषणा यायेमाःगु माग याना आन्दोलन याइगु जूगु दु । 

विहिवाः ऐतिहासिक नेवाः वस्ती तोखाय् च्वंगु केन्द्रीय समितिया मुँज्यां उगु कथंया निर्णय याःगु खः । २००८ सालय् सत्यनारायण बहादुर श्रेष्ठ अध्यक्ष ल्यया नेपाल पत्रकार संघ गठन याःगु अले लिपा २०१२ सालय् उगु संघयात पुनः गठन यानाः सन्त नेता कृष्णप्रसाद भट्टराईया नायः ल्यःगु इतिहासय् स्पष्ट जुइक जुइकं हे आःतक नं कृष्णप्रसाद भट्टराईयात हे नेपाल पत्रकार महासंघया संस्थापक नायः ल्ययातःगुलिं बास्तविकतायात स्वीकार यायेमाल धकाः पत्रकार दबुलिं आन्दोलन यायेगु निर्णय याःगु खः । 

नेवाः जूगु नातां हे नेपाल पत्रकार महासंघं सत्यनारायण बहादुर श्रेष्ठयात संस्थापक नायःया रुपय् अस्वीकार याःगु ठहरयासें आन्दोलन यायेगु निर्णय यानागु खः धकाः नेवाः पत्रकार राष्ट्रिय दबूया नायः श्रीकृष्ण महर्जनं धयादीगु दु । 

आन्दोलनया तयारी कथं थ्वहे मंगलवाः सरोकारवाला पत्रकारतय्गु दथुइ अन्तक्र्रिया ज्याझ्वः यायेगु नापं आन्दोलनया ज्याझ्वः तकं घोषणा यायेगु तयारी याःगु दु । 

थुगु आन्दोलनय् नेपाःया आदिवासी जनजाति पत्रकारतय्गु मंकाःगु संगठन नेपाल आदिवासी जनजाति पत्रकार महासंघ नं नापनापं दइ धाःगु दु । 

आन्दोलनया झ्वलय् पत्रकार महासंघय् धर्ना तकं च्वंवनेगु जुइ धाःगु दु ।