Sunday, August 25, 2019

नेवाः पत्रकार राष्ट्रिय दबू येँ कचाय् अरबिन मान सिंया नेतृत्व

Newly Elected Kathmandu Committee, NFNJ 

गुंलागाः नवमि (August 24, 2019)

नेवाः पत्रकार राष्ट्रिय दबू येँ कचाया शनिबार जूगु स्वक्वःगु महाधिवेशनं अरबिन मान सिंया नेतृत्वय् न्हूगु ज्यासना पुचः ल्यल । उगु अधिवेशनय् प्रविण डंगोल उपाध्यक्ष, रत्न महर्जन सचिव, शरण डंगोल सहसचिव, विनिता शाही, सहसचिव राजेन्द्र मानन्धर नीलः कोषाध्यक्ष ल्यःगु दु । अथे हे दुजःपिं बिमला मानन्धर, शैलेस डंगोल, रेखा शाक्य, किचः सिंह, राजेन मानन्धर, रोजिता बुध्दाचार्य, सहयोग रंजित, बिजय सिं, व मनोजरत्न शाही दु ।

ज्याझ्वःया उद्घाटन सत्रय् नवासें येँ महानगरपालिया मेयर विद्यासुन्दर शाक्यं विशेष यानाः येँ च्वंपिं पत्रकारतय्सं महानगरपालिकाया गतिविधियात सत्यतथ्य उलाः समाचार च्वयेमाःगु खँ जोड बियादिल । वय्कलं गलतयात गलत धायेगु व सहीयात सही धायेगु धर्म पत्रकारतय्सं त्वःते मजिउगु खँ ककं थौंया अवस्थाय् नेवाः पत्रकारत दक्व व्यवसायिक जुइमफुगु अले व्यवसायिक वा मिशन पत्रकारितायात नापनापं यंकेमाःगु अवस्थाय् दु धयादिल । उकियालिसें पत्रकार दबूयात बिइ धकाः क्वःछिनातयागु ध्यबा इलय् काःमवंगुलिं द्यापं च्वनेमाःगु खँय् नं दुख प्वंकादिल । अथे हे दबूया छेँ दनेत जग्गा लुतधाःसा माःगु आर्थिैक ग्वहालि यायेगु बचं नं वय्कलं बियादिल ।

अथे हे प्रदेश सभासद राजेश शाक्य व जीवन डंगोल नं अन पाहाँ कथं झायादीगु खः । शाक्यं नेवाःत हरेक क्षेत्रय् संगठित जुयाः वनेमाःगु खँय् जोड बियादिल । अले थः दुबलय् हे पत्रकार दबूया छेँ दनेत ग्वाहालि यायेत नं तयार दु धयादिल । डंगोलं नेवाः कला व संस्कृति धइगु हे नेपाःया म्हसिका जूगुलिं उकिया संरक्षण व सम्बर्धन यायेत राज्यं नं भूमिका म्हितेमाःगु खँ लुमंकाबिउसें थज्याःगुखँयात माःथाय् तक थ्यंकेत नेवाः पत्रकार विशेष रुपं सक्रिय जुइमाःगु खँ नं उलादिल ।
Addressing Senior Photo Journalist Gopal Chitrakar

विशेष अथिति नेपाल कला प्रज्ञाप्रतिष्ठानया उपकुलपति गोपाल चित्रकारं स्वनिगःया सम्पदा विश्वया हे सम्पदा जूगुलिं उकिया प्रचार प्रसार यायेगु व उकिया बारे विद्यार्थीपिन्त ब्वंकेगु व्यवस्था स्थानीय सरकारं यायेमाः धइगु माग यानादिल ।
Addressing Central President of NFNJ, Shree Krishna Maharjan

नेवाः पत्रकार राष्ट्रिय दबूका केन्द्रीय अध्यक्ष श्री कृष्ण महर्जनं दबुलिं यानावयाच्वंगु थी थी ज्याझ्वःया जानकारी बिसें नेपालय् पत्रकारिताया संस्थागत विकासया खँय् नेवाः पत्रकारतय्गु विशेष भूमिका दूगु खँ लुमंकादिल ।
Presenting Economical Report on 5th AGM of NFNJ, Treasurer Rajendra Manandhar

उगु हे सत्रय् येँ कचाया सचिव प्रजित शाक्यं दबूया प्रगति विवरण व कोषध्यक्ष राजेन्द्र मानन्धर नीलःनं आर्थिक विवरण पेश यानदिल ।
Honoring President of NFNJ Kathmandu, Nati Kaji Maharjan 

 अथे हे अन निगू कार्यकाल तक नेतृत्व बियादीम्ह नातिकाजी महर्जनयात हनेगु ज्या जुल । महर्जननं थ्व हे ज्याझ्वलय् नेवाः फोटो पत्रकारयात दँय् दसं पुरस्कार बिइत अक्षय कोष दयेकादीगु दु । उकिया १ लाख २५द्वः तका ध्यबा उकिया निर्णायक समितिया अध्यक्ष दानदास श्रेष्ठयात लःल्हानदिल ।

News Source: Jheegu.com
Photo: KK Manandhar

No comments:

Post a Comment