ज्ञानकाजी मानन्धरलाई नेवाः पत्रकारको अभिनन्दन

ज्ञानकाजी मानन्धरलाई नेवाः पत्रकारको अभिनन्दन

फागुन ३, केके मानन्धर 
संस्कृति सम्बन्धीका ज्ञाता ज्ञानकाजी मानन्धरलाई नेवाः पत्रकार राष्ट्रिय दबू काभ्रे शाखाले एक कार्यक्रमकाबीच अभिनन्दन गरेको छ । सांस्कृतिक पक्ष तथा शिक्षा क्षेत्रमा दिनुभएको अतूलनीय योगदानलाई कदर गरी दबूले बनेपाका ८२ वर्षिय स्रष्टालाई अभिनन्दन गरेको हो । मानन्धरले लिजेन्ड अफ नेपाल, कुमारी, खड्गयोगिनी, बनेपा स्तवन, कपिलबस्तुस भगवान लगायतका करिव दर्जन पुस्तक प्रकाशन गरेका छन् । उहाँले बुद्ध धर्म तथा नेवार समुदाय सम्बन्धीका थुप्रै लेख रचना समेत प्रकाशन गरेका छन् ।

कार्यक्रमलाई सम्बोधन गर्ने क्रममा मानन्धरले काभ्रेको पनौती ऐतिहासिक र धार्मिक दृष्टिकोणले पवित्र भएको बताउँदै यस्ता सम्पदा संरक्षणमा लाग्न आव्हान गरे । ‘पौराणिक दृष्टिकोणले समेत पुण्य भूमि भएकोले हाम्रा पूर्खाले सिर्जेका धार्मिक गन्तव्यलाई संरक्षण गर्नुपर्छ । यहाँका काष्ठकलादेखि धात्तुकला, मूर्तिकला विश्वकै अद्वितीय नमूना हो ।’ मानन्धरको भनाई थियो । हुनपनि नेपाल सरकारको भ्रमण वर्ष २०२० लाई लक्षित गरी पनौतीका धार्मिक क्षेत्रलाई पर्यटकीय गन्तव्यको रुपमा विकास गर्न सकिन्छ । हाम्रा बाजेपूर्खाले बनाएका कलाकौशललाई प्रचारमा ल्याउन सके आर्थिक उपार्जन गर्न सकिन्छ ।

त्यस्तै, नेवाः पत्रकार राष्ट्रिय दबूका केन्द्रीय अध्यक्ष सुरजवीर बज्राचार्यले पत्रकारितामार्फत समुदायको आवाज मुखरित गर्दै आएको बताउँदै सत्यनारायण बहादुर श्रेष्ठ र धर्मादित्य धर्माचार्यको योगदानलाई स्मरण गरे । ‘सत्यनारायण बहादुरले २००८ मा तत्कालीन नेपाल पत्रकार संघ गठन गरे । त्यसलाई नै पुनर्गठन गरी २०१२ मा नेपाल पत्रकार महासंघ बनाएको हो ।’ बज्राचार्यले दाबी गरे । सत्यनारायण बहादुर श्रेष्ठले नै नेपालमा सबभन्दा पहिले पत्रकारहरुलाई संगठित गरेको दाबी गर्दै उहाँलाई नेपाल पत्रकार महासंघको संस्थापक अध्यक्ष बनाउनुपर्नेमा अन्य पत्रकारको नाम प्रचार भइरहेकोमा असन्तुष्टि पोखे । बज्राचार्यले धर्मादित्य धर्माचार्य पनि नेपालकै पहिलो मातृभाषी पत्रकार भएको दाबी गरे ।

कार्यक्रममा नेवाः पत्रकार राष्ट्रिय दबूको तेस्रो राष्ट्रिय महाधिवेशनमा निर्वाचित केन्द्रीय कार्यसमितिलाई बधाई तथा शुभकामना दिइएको थियो । काभ्रे शाखाका कार्यसमितिलाई प्रमाणपत्र तथा सहभागी सबैलाई खादाले स्वागत गरिएको थियो ।

पनौतीमा आयोजित कार्यक्रममा वरिष्ठ साहित्यकार मोहन दुवाल, सूर्यप्रसाद लाकोजु, शिक्षासेवी शिवशंकर मानन्धर, सामाजिक क्षेत्रमा सक्रिय महानुभाव, पत्रकार, महिला तथा भद्र भलाद्मीहरूको सहभागिता थियो । नेवाः पत्रकार राष्ट्रिय दबू काभ्रे शाखाका अध्यक्ष सिद्धिबहादुर कर्माचार्यको सभापतित्वमा सम्पन्न कार्यक्रमलाई सचिव शम्भुलाल श्रेष्ठले सञ्चालन गरेका हुन् । कार्यक्रमलाई केन्द्रीय सदस्य तथा साहित्यिक पत्रकार विजयराम कर्माचार्यले संयोजन गरेका थिए ।

Picture courtesy: Nzan Rajkarnikar

More pictures: